Home » Brahui » لُمی آ بولی براہوی کھنگ اےولے نن تُنگان اُن

لُمی آ بولی براہوی کھنگ اےولے نن تُنگان اُن

[arabic-font]

لکوکا:-علی گل سرپرہ

سنگت اک اسے دے تولوک اسونا گوڑی آ ہوٹل آ داسکا چا نا پیالہ اے با غا تیختوسن انداڑتو ماما پنیر بند پارے خواجہ سلام مالیک ،سنگت اس پارے چاوا دا شوم تو لچیفین۔

ای پاریٹ پیر و بندغ اسے دُن پاپا تے، خیر ماما پنیر بند اے چا نا سلا خلکوٹ پارے پین کس اتو وارا کنپک کنے ولے نے تو چا کونیوا، توس ماسا کنا پارے ایت حق انا کیوا بد بس نمے بشخرے کنے ، ای پاریٹ کرینگ تیفیس ننے پین انت کہ پاسا پا کنا دا ایت لخٹی تما بش مس پارے نی ام کنے گنوک تکیسا ، دُو ٹی تے الکوٹ پاریٹ ماما پنیر بند نی ننا پیر انگا اُس نی دُن ذو انتے غُصہ کیسا،خیروُ اے پاریٹ ماما پنیر بند کہ زو اس جُوان او گوڑی او چا اس اتا۔

پاریٹ ماما پنیر بند نی پا انتے داخا غصہ ٹی اوس چاوا تاتی چیڑانے ، مخا پارے دا پیری ٹی گلی نا کُچک اک ہم ننے آ غوکیرا ، ماما پنیر بند ایت احوال اے، پارے ملخی اسے ادبی او تنظیم اس جوڑ کرینے ، ای پاریٹ دا تو جُوان او ایت اسے لُمی ا بولی کہ کاریم اس تو مریک یونیسکو پارے نے براہوی کھنگ ان خوڑک انگا بولی تان اسیٹ اے، اگا نن تینا لُمی آ بولی کہ اچ اس کتون گوڑا بروکا نسل اک ننا ننے معاف کپرور،مخا پارے ملخی ام اندون پاریکہ ولے ننا شال انا ڈاسکر اتے امبار نم ام مرض اے پو مفیرے ولے علاج کننگ کہ تکڑا اورے، ای پاریٹ ماما پنیر بند او جوان او کاریم اس کننگ او کتاب لکھنگ او کانفرنس اڈ تننگ او ولے حکومت افتے فنڈ تیفک، چیڑا کنے آ پارے عقل ارے اف نے داخا خوانیرے ولے پو اچ مفیرے، پارے ارف نی کتاب اس پٹا براہوی اے چڑا پین بولی تا لوظ اتے لکھرے تینا بولی نا لوظ اتے کسیفنگ اورے ، شاعری اے تینا اُببو پارے وزن برابر کننگ کہ نن پین بولی تا لوظ اتے استعمال کین،ماما پنیر بند دا گناہ اس تو اف، ماما پنیر بند کاٹم اے تینا الک آڑسندس کشا پارے نُمے ان گلہ اف کنا ایت اتے آ کنا ھنکین اٹی ملنڈ کیرا گوڑا پین کس اے انت پاروٹ،ماما پنیر بند نی چا کن چُرت خلپا، پارے امر چُرت خلپر کنا ھنکین اٹی لسی ،چینی، بورچی خانہ، واش روم، انکل ،انٹی، دی دی، دسترخوان او انت انت پارا، ماحول نا دُو تے ان کنا براہوی ام برباد مسونے گوڑا نما او بروکا نسل اتا انت حال مرو اے، دا کتاب اک اسے کنے امبار انگا ان پڑھ نا بولی اے امر جوان کرور، پین نا بولی ٹی ایت کننگ اے فخر اس چانا او تینا براہوی بولی ٹی ایت کننگ آ شرم بریک ننے، لوظ اتے تینا بچیفینگ کپا نا ولے داوا بلو بلو کینا، احساس کمتری ان بیدس اچ مسلہ ننا اف،ماما پنیر بند وخت اتو اوار چلینگوی تمیک داسا نی ملک خواجہ حبیب اے اُر براہوی نا اولیکو دیوان اے لکھا، او داخا مشکل اے نن پو مفنا تے دُن انگا شاعری اچ چس کپک، ماما پنیر بند بش مس پارے نمے انمار انگا جاہل اتے تو تولنگ ام فضول اے ، منت کرین ماما پنیر بند اے دروی تیسُن تولیفین، ای پاریٹ ماما پنیر بند نن پڑھا لکھا جاہل اُن نی خُوانتنوس ولے ننے ان زیات پو اُس ،نی غصہ کپا ننے پو کا، پارے ملک خواجہ حبیب براہوی ٹی شاعری کیک نم براہوی ایل کبو کہ پو مریرے تے خاخو اے پیون تو پاپبو ،براہوی نمے بفک کسور ملک خواجہ حبیب نا ، اندا ایت اتے ملخی ام تو کریکہ ، ماما پنیر بند تنقید تو ار کس کیک ننا اندا تو مسلہ اے، اسے بند غ اس کاریم اس جوان او کننگ اے نن اچ اس کننگ افن گوڑا تنقید انتے کین افتا، ماما پنیر بند پارے نن کھوک ان کہ تنقید ام کننگ کپنا انداڑان پنجا خان ننیکا توغ اس خنا صھب اتو تاریخ بلوچستان اس لکھا ولدا ملخی اے تیس تے او چاپ کریر تے ، پنجا خان تاریخ دان اس مس ملخی نا پن مس کہ اسے کتاب اس پین چاپ کرین ولے ظلم دیر تو مس؟ نی لکھا ای داسا سٹی او تاریخ اس پاوا نے گوڑا کن کونا گنوک ام تاریخ دان اس مننگ کیک، ماما پنیر بند گوڑا نن انت کننگ کینا؟ عقل ارے اف نے داسا انت پاریٹ نے ملنڈ کبو۔ ماما پنیر بند نی کنے پا براہوی اے کھنگ ان امر بچیفین ،ماما پنیر بند پارے “ملنڈ کبو” ، پو متوٹ ماما پنیر بند، تنقید کبو، ماما پنیر بند نی جُوانی ٹی پو کہ ، ماما پنیر بند پارے اگہ کس اس براہوی بولی نا جاگہ غا پین بولی نا لوظ اس پارے یا تینا شاعری ٹی لکھا اوڑا ملنڈ کبو انداخا کہ اودے لگے کہ ای اسے رد اس کرینوٹ دا وڑ نن تینا لُمی آ بولی کے گیڑاس کننگ کینا، تاریخ اس اگہ کس لکھا اوڑان اریفبو کہ انت تحقیق کرینوس اگہ تینے ان لکھانے گوڑا ملنڈ کبو اریفبو کہ تاریخ اسے یا دیو مالای او قصہ سے کہ ارکس تینا مرضی آ اسے قصہ اس لکھے۔

کنا سنگت اس پارے ماما پنیربند سفا انگا ایت دا دے داخا وخت نن نے گنوک اس سمجا نہ ولے اینو پو مسون کہ گنوک تو نن مسونون نی تو بلو جُوان او سوچ والا بندغ اسے اُس۔ ماما پنیر بند پارے کنے انت کہ پارے پا بو ولے تینا لُمی آ بولی اے کھنگ ان بچفبو،بیرا داوا کپبو۔

 

[/arabic-font]

About Ali Gul Sarparrah

Leave a Reply

Your email address will not be published. Required fields are marked *

*

WpCoderX